KARPENTERO

Ingon ni Tatay

karpentero — Sun, 22 Mar 2009 11:46:50 +0000

Gisultian ko ni Tatay
unsaon pagpakighilawas
sa usa ka babaye,
“Tan-awa ang lubi.”

Nidungaw siya sa bintana
ug iyang gitudlo ang lubi
nga may duha ka bunga,
“Unya, unsa may naa diha?”

Sa kalit na pagkusog
sa haguros sa hangin,
gitudlo niya isa-isa
ang dahon, ang bunga, ang lawas

“Samtang nagkurog-kurog
ang iyang bungot
ug naglaylay
ang iyang duha ka itlog,

nisulod ang ulo
sa iyang lagay
didto sa ilalom
sa bilahan sa yuta.”

Ug ako nakaingon
sa akong kaugalingon,
“Unta ako na lang
ang yuta.”

Litrato sa Dingding

karpentero — Thu, 19 Mar 2009 07:59:20 +0000

Dili na nimo makit-an
ang akong nawong

apan madungaw gihapon nimo
ang akong litrato sa dingding.

Kung mabati nimo
ang katugnaw sa akong pagbiya,

sumbaga ang akong litrato
hangtod mabuak kini sa dingding

aron mugawas sa imong kamot
ang kaniit sa dugo

sama sa panahon nga gilambos nimo
ang akong nawong

kadtong wala pa ang akong litrato
gibitay sa dingding.

kung niabot ka

karpentero — Wed, 18 Mar 2009 03:57:43 +0000

kung ikaw niabot para sa sunod nga sulat
sayop ang lugar nga imong giadtuan
napudpod na ang tumoy sa akong lapis
ug dugay ng naupos ang papa
wala nakoy maingon kanimo
aron ikaw makasabot
gisayang lang nimo ang imong pag-anhi
kay wala nay mudasig pa kanako
kanimo, wala na ang akong panagsaong gana
mohatag ko dili na ug mga kasakit kanimo
apan kahilom nga imong handumon
mapasaylo ba ko nimo
nga ikaw mulakaw kauban kamot nga walay dala?
unta nitawag ka samtang ako naghulat
aron ikaw makahibalo ka
nga dili nako
musulat pa kanimo.

Sigarilyo

karpentero — Mon, 16 Mar 2009 05:43:02 +0000

sa akong ulahing buga
aning hupas nga Malboro
akong ihungaw pag-apil
ang ngutngot gikan
sa gamatoy nga hiwa
sa akong baga
nga nagarasan kadtong
gipidpid ako
sa imong haluk
nga kunohay
timaan
sa akong pagsalig
nga ako ang
katunga
sa imong
kasing-kasing.

Humay

karpentero — Sun, 15 Mar 2009 02:55:55 +0000

ayaw pugsa
ug tanom ang usa
ka lugas nga humay
kung kini
walay gamut
kay masayang lang
ang yamog
sa mga balili
nga misunop
sa yuta
ug dili gihapon ni
matubuan
ug usa lang
ka dahon
bisag hait
pa sidlak
sa adlaw.

Kadtong Gilumay Ta Sa Kadagatan

karpentero — Sat, 14 Mar 2009 13:43:45 +0000

(para kanimo, LGJ)

Kantahi ko
samtang gigakus ko ikaw.
Iganid ug gunit ang imong mga kamot
sa tibuok kong lawas
ug akong ihandus pag-apil
Ang tibuok kong kusog
paduol sa imong dughan.
Itanday ang imong ulo
sa akong abaga
kay tamokon sa akong liog
ang matag hungaw sa imong ginhawa.
Lilia ang akong kaguol
diri sa ilalom sa akong mga pahiyom
samtang akong giyawit sa makadaghan
ang imong kakapoy.

Ihalug ang imong mga kahadlok
ngadto sa haguros sa hangin
ug malagnot pag-apil ang akong kakulba.
Ayaw itakli ang kasakit sa matag hangus
kay akong ikiyuob ang akong lawas
aron kita magaid sa kahinug sa sagawsaw sa tubig.
Ihabol sa akong lawas ang imong kainit
ug musagol ang akong katugnaw
sa imong mga singot nga nipilit sa akong mga ngabil.

Ug kantahan ko ikaw
samtang nagdamgo ang kagabhion

ug kita magkisikisi
samtang saksi ang mga balod sa atong kalipay.